У Мінску стартаваў ХІV Форум ВНУ інжынерна–тэхналагічнага профілю Саюзнай дзяржавы.

Да 25 кастрычніка ўключна Беларускі нацыянальны тэхнічны ўніверсітэт будзе эпіцэнтрам маштабнай падзеі — тут праходзіць ХІV Форум ВНУ інжынерна–тэхналагічнага профілю Саюзнай дзяржавы. Мерапрыемства сабрала звыш тысячы навукоўцаў, спецыялістаў, студэнтаў, магістрантаў і аспірантаў з больш чым 40 ВНУ Беларусі, Расіі, Узбекістана і іншых краін.

Сёлета асноўная канцэпцыя форуму, які праводзіцца з 2012 года, прысвечана прыярытэтным кірункам навуковай, навукова–тэхнічнай і інавацыйнай дзейнасці ВНУ Саюзнай дзяржавы, развіццю інжынернай адукацыі ў Саюзнай дзяржаве і маладзёжнага інавацыйнага прадпрымальніцтва, а таксама патрыятычнаму выхаванню ў інжынернай адукацыі Саюзнай дзяржавы.

«Унікальнасць форуму ў тым, што падобнай падзеі сярод інжынерных ВНУ няма нідзе ў свеце, — адзначыў падчас урачыстай цырымоніі адкрыцця намеснік Дзяржаўнага сакратара Саюзнай дзяржавы Аляксей Кубрын. — Ёсць падпісаныя пагадненні паміж асобнымі ВНУ, працягваюцца абмены інфармацыяй, тэхналогіямі, методыкамі навучання. Але такой маштабнай падзеі няма. Асаблівасць нашага форуму яшчэ і ў тым, што цікавасць да яго за ўсе гады, якія ён праводзіцца, не падае, а, наадварот, павялічваецца».

Аляксей Кубрын падкрэсліў, што сёння інжынерныя спецыяльнасці ставяцца ў аснову. «Мы прыйшлі ўжо да практычнага вырашэння той задачы, якая пастаўлена двума прэзідэнтамі, — аб павышэнні прэстыжу інжынерных прафесій і павышэнні якасці спецыялістаў, якія выпускаюцца. Таму што мы павінны забяспечыць самы высокі ўзровень якасці прадукцыі і самыя высокія тэхналогіі», — сказаў ён.

Сярод актуальных праектаў у інжынерным кірунку намеснік дзяржсакратара Саюзнай дзяржавы вылучыў у першую чаргу авіяцыйную галіну: «Задача пастаўлена Прэзідэнтам Беларусі Аляксандрам Лукашэнкам — ствараць авіяцыйную галіну ў Беларусі. Значыць, неабходна рыхтаваць спецыялістаў, а гэта найшырэйшы спектр».

Адзін з вядучых вектараў, якім заўсёды славілася Беларусь, — машынабудаванне. «Значыць, трэба рыхтаваць самых сучасных спецыялістаў па гэтым кірунку. Быў пэўны перыяд часу, калі інжынерным спецыяльнасцям удзялялася мала ўвагі. Цяпер трэба папаўняць колькасць інжынерных спецыялістаў для таго, каб прадпрыемствы па–ранейшаму працавалі ў сур’ёзным тэмпе, — канкрэтызаваў Аляксей Кубрын. — Акрамя таго, нельга забываць пра „бум“, які працягваецца ў касмічнай тэматыцы. Ёсць задача кіраўніка дзяржавы аб фарміраванні падрыхтоўкі да выхаду на арбітальную групоўку спадарожнікаў дыстанцыйнага зандзіравання Зямлі. Гэта таксама шырокі спектр спецыялістаў. Тыя прадпрыемствы, якія сёння ёсць, загружаныя досыць сур’ёзна, але людзей менавіта высокай кваліфікацыі ўсё роўна не хапае».

Першы намеснік міністра адукацыі Беларусі Аляксандр Бахановіч адзначыў важнасць інжынернай адукацыі для падрыхтоўкі спецыялістаў, якія робяць важкі ўнёсак у развіццё эканомікі краіны: «Канцэпцыя развіцця інжынернай адукацыі, якая нядаўна прынята ўрадам на найбліжэйшыя 10 гадоў, праграма стварэння цэнтраў кампетэнцый і іншая работа, што сёння выконваецца ў Міністэрстве адукацыі разам з ВНУ, вядучымі прадпрыемствамі, заказчыкамі кадраў, безумоўна, дае свае вынікі.

З будучымі спецыялістамі мы павінны гэтую работу пачынаць з ранняга ўзросту. Бачым, як эфектыўна запрацавалі нашы інжынерныя класы. З 2,5 тысячы выпускнікоў сёлета больш за 70 % паступілі ў ВНУ на інжынерна–тэхнічныя спецыяльнасці. Прыцягваем нашу моладзь да інжынерна–тэхнічнай адукацыі. У гэтым сэнсе форум ВНУ міжнароднага тэхналагічнага профілю — тая пляцоўка, дзе сустракаюцца спецыялісты і абмяркоўваюць цэлы шэраг пытанняў».

Аляксандр Бахановіч выказаў меркаванне, што спачатку трэба прыцягнуць маладога чалавека і ў інжынерна–тэхнічную адукацыю, і ў навуку, а затым аказаць яму ўсялякую дапамогу для таго, каб бізнес–інкубатары, стартап–праекты, праграмы настаўніцтва навукоўцаў і педагогаў дазволілі давесці сваю ідэю спачатку да нейкага зразумелага ўзору, а затым каб гэтая прадукцыя была пастаўлена на вытворчасці і працавала на эканоміку краіны.

Падчас урачыстай цырымоніі адкрыцця рэктар БНТУ Сяргей Харытончык нагадаў вынікі мінулых форумаў: «За 13 гадоў правядзення мерапрыемства мы дасягнулі вялікай колькасці вынікаў. Адзін з прыкладаў поспеху — стварэнне перадавой інжынернай школы Саюзнай дзяржавы ў галіне гібрыднага станкабудавання.

У гэтым кірунку мы стварылі новыя навучальныя праграмы, зрабілі акцэнт на лічбавізацыі, новых метадах падрыхтоўкі нашых студэнтаў. Мы таксама стварылі канструкцыю гібрыдна–апрацоўчага цэнтра. І сёння разам з расійскімі партнёрамі ўпэўнена рыхтуем спецыялістаў для гэтых кірункаў».

Паводле яго слоў, мы самі сталі рыхтаваць спецыялістаў у галіне атамнай энергетыкі для Беларускай атамнай электрастанцыі. «На першых этапах Ніжагародскі дзяржаўны тэхнічны ўніверсітэт узяў асноўныя моманты падрыхтоўкі нашых студэнтаў на сябе. Паступова мы пераймалі іх вопыт і сёння ўжо самастойна вядзём падрыхтоўку сваіх студэнтаў для гэтай галіны. Таксама з пачатку правядзення форуму вельмі актыўна заняліся падрыхтоўкай спецыялістаў для патрэб абароннага комплексу. Такога кірунку не было ў нашым універсітэце, і наш партнёр — Іжэўскі дзяржаўны тэхнічны ўніверсітэт — спрыяў стварэнню гэтага кірунку навучання ў нас», — паведаміў рэктар БНТУ.

Асноўная канцэпцыя форуму прысвечана папулярызацыі інжынернай адукацыі, прыцягненню моладзі ў сферу навукі, стварэнню міжуніверсітэцкай платформы для рэалізацыі ключавых кірункаў беларуска–расійскага інтэграцыйнага супрацоўніцтва па прыярытэтных вектарах развіцця навукі і тэхнікі і падтрымцы таленавітай моладзі.

Данііл Хмяльніцкі

Фота БНТУ

Источник: Звязда

БНТУ рыхтуецца прыняць Форум ВНУ інжынерна–тэхналагічнага профілю Саюзнай дзяржавы.

На 5 дзён беларуская сталіца стане цэнтрам інжынерна–тэхналагічнай думкі. З 21 да 25 кастрычніка 2025 года ў БНТУ пройдзе ХІV Форум ВНУ інжынерна–тэхналагічнага профілю Саюзнай дзяржавы. Гэта падзея стане ўнікальнай пляцоўкай для ўзаемадзеяння вядучых навучальных устаноў, вучоных і студэнтаў з Расіі і Беларусі, якія аб’ядналі агульныя інтарэсы ў сферы інжынерыі і сучасных тэхналогій.

«У форуме ўдзельнічаюць студэнты Саюзнай дзяржавы і замежныя партнёры, — расказаў рэктар БНТУ Сяргей Харытончык. — Мы бачым, наколькі ўзрасла роля інжынерыі ў нашых краінах. Гэтаму ўдзяляецца першарадная ўвага ў падрыхтоўцы кадраў. Наш форум папулярызуе гэтыя прафесіі і кірункі, паказвае перавагі, якімі спецыялісты будуць валодаць пры завяршэнні навучання ва ўніверсітэтах».

«Пытанне развіцця інжынернай адукацыі знаходзіцца ў „топе“ ўвагі кіраўнікоў краін, урадаў, міністэрстваў. Якасць падрыхтоўкі інжынераў вызначаецца тэхналагічным развіццём краін — гэта ў аснове. Будзе абмяркоўвацца штучны інтэлект, сучасныя інфармацыйныя тэхналогіі», — удакладніў Сяргей Харытончык.

Адна з асноўных задач форуму — даць шанц удзельнікам паказаць усе свае магчымасці, каб сфарміраваць здаровую канкурэнцыю. Моладзь актыўна рыхтуецца да бізнес–баёў, іншых мерапрыемстваў форуму і спадзяецца паказаць сябе з лепшага боку.

Падчас работы форуму будуць прапрацаваны пытанні стварэння сумесных адукацыйных праграм і правядзення сумесных даследаванняў, падкрэсліў Сяргей Харытончык:

«Гэта пляцоўка таксама стане добрай магчымасцю для таго, каб дасягнуць дамоўленасцяў па рэалізацыі канкрэтных кірункаў і знайсці пункты ўзаемадзеяння з расійскімі ВНУ. Па выніках правядзення папярэдніх форумаў ужо былі дасягнуты некаторыя буйныя дамоўленасці. Адной з іх стала стварэнне перадавой інжынернай школы Саюзнай дзяржавы на базе дзвюх ВНУ: Пскоўскага дзяржаўнага ўніверсітэта і Беларускага нацыянальнага тэхнічнага ўніверсітэта. Па гэтым кірунку сёння рэалізоўваецца і актыўна развіваецца шэраг адукацыйных праграм у галіне гібрыдных тэхналогій і станкабудавання».

Паводле слоў першага прарэктара БНТУ Андрэя Сафонава, цеснае супрацоўніцтва з расіянамі дазваляе пераймаць апошні вопыт у адукацыі і развіцці тэхналогій: «Намі створана перадавая школа Саюзнай дзяржавы па станкабудаванні. Гэта ўнікальны прыклад сярод 30 падобных школ, адзіны варыянт двайнога ўдзелу Беларусі і Расіі. Дзякуючы такім напрацоўкам падобная школа дзейнічае ў БНТУ. Мы рыхтуем спецыялістаў, выкарыстоўваючы патэнцыял дзвюх краін. Дзякуючы форуму ў нас цесныя сувязі з Ніжагародскім тэхнічным універсітэтам. У звязку мы вядзём падрыхтоўку нашых спецыялістаў. Ужо адбыліся выпускі для нашай атамнай галіны і энергетыкі».

Данііл Хмяльніцкі

Источник: Звязда

Якія тэмы былі ў цэнтры ўвагі сенатараў на мінулым тыдні.

*     *     *

Андрэй Сідараў, член Пастаяннай камісіі Савета Рэспублікі па эканоміцы, бюджэце і фінансах, генеральны дырэктар прыватнага вытворча–гандлёвага ўнітарнага прадпрыемства «Вітбудтэхмаш» наведаў Беларускі нацыянальны тэхнічны ўніверсітэт. Сенатар азнаёміўся з матэрыяльна–тэхнічнай базай усіх факультэтаў універсітэта і інавацыйнымі распрацоўкамі навукова–тэхналагічнага парка БНТУ «Палітэхнік», узяў удзел у круглым стале з прафесарска–выкладчыцкім складам і студэнтамі. «Адной з актуальных задач развіцця сучаснай эканомікі з’яўляецца арганізацыя цеснага ўзаемадзеяння ўстаноў адукацыі з прадпрыемствамі–работадаўцамі. Навучанне павінна быць практыка–арыентаваным, каб рыхтаваць кваліфікаваных канкурэнтаздольных выпускнікоў», — адзначыў Андрэй Сідараў.

Поўны тэкст публікацыі гл. у pdf–файле.

Валерыя Сцяцко

Источник: Звязда

Учора ў Мінску адбылося ўрачыстае адкрыццё новага інтэрната.

Свой часовы камфартабельны дом падзеляць студэнты двух універсітэтаў — БНТУ і БДТУ.

Новы, з іголачкі, будынак па архітэктуры пераклікаецца са знакамітым навучальным корпусам БНТУ, які знаходзіцца побач, а ўнутры проста «дыхае» камфортам. Блокі з пакоямі на 2 або 3 месцы, у кожным — асобныя кухня, санвузел і душавы пакой. Ёсць у інтэрнаце спартыўная і трэнажорная залы, пральня, кафэ і іншыя сучасныя выгоды, якія можна пералічваць вельмі доўга, як, зрэшты, і апісваць эмоцыі студэнтаў, якія толькі ўсяліліся ў новае жыллё.

…У дзень адкрыцця інтэрната свой настрой маладыя людзі перанеслі на пляцоўку каля ўвахода ў іх агульны дом. Падзяліць радасць студэнтаў прыбылі высокія госці – намеснік прэм’ер–міністра Ігар Петрышэнка, міністр адукацыі Андрэй Іванец, прафесарска–выкладчыцкі склад БНТУ і БДТУ, іншыя афіцыйныя асобы.

— Адукацыя ў жыцці кожнага чалавека займае асаблівае месца, — звярнуўся да ўдзельнікаў цырымоніі Ігар Петрышэнка. — Таму сфера адукацыі заўсёды знаходзіцца ў цэнтры ўвагі кіраўніка нашай дзяржавы і ўрада Беларусі. І менавіта таму Аляксандр Лукашэнка ў 2020 годзе прыняў рашэнне аб будаўніцтветрох інтэрнатаў і вучэбна–лабараторнага корпуса Беларускага дзяржаўнага медыцынскага ўніверсітэта. Мы гэтую задачу выканалі і сёння адкрываем ужо трэці інтэрнат для Беларускага нацыянальнага тэхнічнага ўніверсітэта і Беларускага дзяржаўнага тэхналагічнага ўніверсітэта, падзяліўшы пароўну і па–сумленнаму колькасць месцаў паміж студэнтамі дзвюх ВНУ.

Намеснік прэм’ер–міністра выказаў надзею, што ў гэтым цудоўным доме студэнцкая дружная сям’я атрымае новы зарад бадзёрасці і аптымізму, які дапаможа стаць студэнтам добрымі спецыялістамі.

— На працягу ўсёй нашай суверэннай гісторыі мы стараліся, стараемся і будзем далей развіваць і ўдасканальваць матэрыяльна–тэхнічную базу кафедраў нашых ВНУ, — працягнуў Ігар Петрышэнка. — Мы будзем адкрываць новыя спецыяльнасці і спецыялізацыі для таго, каб наша краіна з’яўлялася перадавой ва ўсіх сферах, і нам гэта вельмі важна для падрыхтоўкі магутных інжынерных кадраў. Мы стварылі належныя ўмовы для вашай вучобы, падрыхтоўкі да заняткаў — зрабілі ўсё, што дазволіць вам якасна асвойваць тую спецыяльнасць, на якую вы паступілі ў вышэйшую навучальную ўстанову.

Ён падкрэсліў, што вельмі важна, каб у гэтым сучасным і ў той жа час утульным студэнцкім доме панавалі спакой і сапраўднае студэнцкае сяброўства. Ігар Петрышэнка шчыра падзякаваў будаўнікам, якія ў рэкордныя тэрміны здалі годны будынак з добрымі абсталяванымі пакоямі, а таксама студэнтам, якія прымалі актыўны ўдзел у падрыхтоўцы да адкрыцця інтэрната.

— Я хачу пажадаць вам знайсці ў гэтых сценах сапраўдных сяброў, — сказаў віцэ–прэм’ер, — якія будуць ісці з вамі па жыцці, хачу пажадаць, каб вы сталі сапраўднымі грамадзянамі сваёй краіны і сапраўднымі спецыялістамі ў сваёй галіне.

Пасля перадачы сімвалічнага ключа і традыцыйнага перарэзвання чырвонай стужкі віцэ–прэм’ер, міністр адукацыі, рэктары БНТУ і БДТУ разам з запрошанымі на святочнае мерапрыемства гасцямі азнаёміліся з памяшканнямі ўнутры інтэрната — наведалі залу для аэробікі, трэнажорную залу, блок для пражывання, медыцынскі пункт, буфет.

— Умовы, якія створаны ў новым інтэрнаце, блізкія да ідэальных, — падзяліўся ўражаннямі Андрэй Іванец. — У студэнтаў ёсць усе магчымасці: асобная кухня ў кожным блоку, канферэнц–залы… Сёння вялікая ўвага ўдзяляецца здароўю нашай моладзі, таму ёсць трэнажорная зала, зала аэробікі. Гэта таксама вельмі важна для творчых і знаходлівых.

Кіраўнік адукацыйнага ведамства канстатаваў, што сёння забяспечанасць інтэрнатамі студэнтаў у Беларусі складае больш за 90 %. Што датычыцца зноў адкрытага і падобных яму інтэрнатаў, то, па словах міністра, у іх будуць засяляцца ў першую чаргу тыя, хто праявіў сябе ў вучобе, у студэнцкіх атрадах, конкурсах і іншых карысных актыўнасцях.

«Звязда»

Источник: Звязда

Аб чым Ігар Сергяенка гаварыў са студэнтамі факультэта транспартных камунікацый БНТУ.

Мерапрыемства прайшло ў рамках праекта Палаты прадстаўнікоў «Моладзь для Беларусі!». Спікер праінфармаваў студэнтаў аб структуры і паўнамоцтвах Нацыянальнага сходу, расказаў аб заканадаўчай і міжнароднай дзейнасці дэпутацкага корпуса, рабоце ў выбарчых акругах. Старшыня Палаты прадстаўнікоў прывёў канкрэтныя прыклады, якія сведчаць аб магутным эканамічным патэнцыяле нашай краіны, сацыяльнай арыентаванасці дзяржаўнай палітыкі.

«Сітуацыя ў нас стабільная»

Асобна Ігар Сергяенка спыніўся на дасягненнях суверэннай Беларусі. «Сёння мы пішам новую, чарговую главу нашай гісторыі, падкрэсліў ён. 26 студзеня пройдуць выбары Прэзідэнта Рэспублікі Беларусь. Усе з вас, каму ёсць 18 гадоў, будуць прымаць у іх удзел. Выбары — гэта важная грамадска–палітычная падзея. Выбар павінен быць усвядомлены, у імя будучыні нашай краіны, якую мы вызначаем і будуем самі, ставячы ў прыярытэт інтарэсы не асобнай часткі грамадства, а ў цэлым нашай краіны».

На фоне шэрагу дзяржаў, у тым ліку суседніх з намі, Беларусь развіваецца і стварае сваю будучыню пад мірным небам. «Сённяшняя сітуацыя ў нас стабільная, і цяперашняя выбарчая кампанія праходзіць у спакойнай, канструктыўнай абстаноўцы, — канстатаваў Старшыня Палаты прадстаўнікоў. — Але не варта забываць, што мы з вамі, па сутнасці, знаходзімся ўцягнутымі ў інфармацыйную вайну. Колькі ствараецца шматлікага роду фэйкаў, правакацый, пачынаючы ад паведамленняў, якія вымушаюць людзей пераводзіць махлярам грошы, нягледзячы на работу, якая праводзіцца. На прыватным прыкладзе нейкага нядбайнага прадаўца або няякасна пастаўленага тавару, або аўталаўкі, якая недаехала ў канкрэтны населены пункт, можна паказаць, што гэта сістэмны недахоп, што гэта характэрна ў цэлым для краіны». У сувязі з гэтым спікер заклікаў маладых людзей адэкватна падыходзіць да ўспрыняцця інфармацыі, параіў атрымліваць інфармацыю з дзяржаўных СМІ — у прыватнасці, звяртацца да друкаванай прэсы.

Каля 300 мерапрыемстваў — у рамках праекта

Старшыня Палаты прадстаўнікоў звярнуў увагу на важнасць захавання гістарычнай памяці. Размова ішла аб подзвігу савецкага народа ў гады Вялікай Айчыннай вайны. Адразу ж у аўдыторыі, дзе праходзіла сустрэча, спікер прапанаваў паглядзець фрагмент з расійскай кінастужкі на ваенную тэму, пасля якой, напэўна, ні ў каго з маладых людзей не засталося сумнення ў тым, чаму мы ўсе павінны адстойваць праўду аб нашым гераічным і трагічным мінулым.

Студэнты адрасавалі Старшыні Палаты прадстаўнікоў пытанні. Хлопцы і дзяўчаты цікавіліся, ці варта ўкараняць у выбарчы працэс сучасныя тэхналогіі, што трэба рабіць для таго, каб людзі цанілі ўкладзеныя дзяржавай сродкі на рэканструкцыю і будаўніцтва дарог. Маладыя людзі выказалі прапанову наведваць з экскурсіямі Дом урада, дзе разам з Саветам Міністраў размяшчаецца Палата прадстаўнікоў. Агучвалі і асабістыя пытанні: моладзь цікавіла, ці падабалася ў свой час спікеру вучыцца ў ВНУ і ці карыстаецца ён сацсеткамі. Адным словам, атрымаўся шчыры дыялог, без закрытых тэм.

Вынікі сустрэчы Ігар Сергяенка падвёў у размове з журналістамі. Старшыня Палаты прадстаўнікоў адзначыў, што ў рамках праекта «Моладзь для Беларусі!» дэпутаты выступаюць у маладзёжных аўдыторыях, расказваюць аб сённяшнім дні нашай краіны, аб дасягненнях Беларусі за 30 гадоў прэзідэнцтва.

«Ён задумваўся як праект на базе канкрэтных факультэтаў вышэйшых навучальных устаноў, але зрабіў крок далёка за рамкі запланаванага, — заўважыў спікер. Сёння дэпутаты ўжо правялі каля 300 мерапрыемстваў у розных навучальных аўдыторыях, маладзёжных калектывах, рэгіёнах, горадзе Мінску. Размаўляючы са студэнтамі БНТУ, канкрэтна факультэта транспартных камунікацый, я адчуў, што будучыя інжынеры жыва цікавяцца грамадска–палітычным жыццём нашай краіны. Гэтыя хлопцы і дзяўчаты літаральна заўтра–паслязаўтра прыйдуць у дарожныя арганізацыі і будуць на практыцы рэалізоўваць тыя задачы, якія паставіў кіраўнік дзяржавы ў Год добраўпарадкавання краіны».

Старшыня Палаты прадстаўнікоў звярнуў увагу на тое, што дарожнае будаўніцтва ў Беларусі інтэнсіўна развіваецца. «Цудоўныя магістралі звязваюць горад Мінск з абласнымі цэнтрамі, узмоцнена рамантуецца дарожная сетка ў раёнах, пастаўлена задача кіраўніком дзяржавы зрабіць дарогі паміж аграгарадкамі і раённымі цэнтрамі, — канкрэтызаваў ён. — І вось гэтыя хлопцы і дзяўчаты, якія сёння прысутнічаюць у аўдыторыі, гэтым будуць займацца».

Па словах студэнта 4 курса БНТУ Аляксандра Малашкі, веды, якія маладыя людзі атрымалі з вуснаў Старшыні Палаты прадстаўнікоў, ім абавязкова спатрэбяцца ў будучыні. «Такі фармат сустрэч актуальны: моладзь можа задаць пытанні, якія іх цікавяць, дасведчанай асобе і атрымаць разгорнуты, кампетэнтны адказ», — канкрэтызаваў ён.

Вераніка Канюта

Источник: Звязда

На мінулым тыдні найлепшыя прадстаўнікі ВНУ сталіцы змагаліся за званне «Студэнт года г. Мінска 2024».

У барацьбе за першае месца сышліся 12 пераможцаў адборачных тураў ВНУ. Самыя таленавітыя, актыўныя і ініцыятыўныя. Сёлета канцэпцыя конкурсу была «Студэнт года г. Мінска 2024. Трансфармацыя». Тэматыка падкрэслівае важнасць развіцця асобы і якасных змен.

Бо так важна памятаць аб тым, што кожны з нас здольны зрабіць свой унёсак у паспяховую будучыню і ўдасканаліць свет навокал сябе.

— Студэнцкая пара — час вялікіх магчымасцяў, росту, развіцця, станаўлення асобы. І мне прыемна, што тут няма абыякавых людзей. Ёсць толькі тыя, хто хоча нечага дасягнуць у жыцці. Я жадаю канкурсантам поспехаў. Сёння вы ўжо пераможцы, дзякуючы таму што знаходзіцеся на гэтай сцэне, — адзначыў на адкрыцці мерапрыемства памочнік Прэзідэнта — інспектар па г. Мінску Юрый Фралоў.

У сваю чаргу старшыня Мінскага гарвыканкама Уладзімір Кухараў падкрэсліў, што конкурс сабраў самых крэатыўных, смелых людзей, якія робяць усё, каб не спыняцца ў сваім развіцці: «Я думаю, мы ўбачым шмат цікавага, крэатыўныя ідэі, што рэпеціраваліся на працягу некалькіх тыдняў. Гэта паказвае, што ў Мінску шмат маладых людзей, якія імкнуцца да поспеху».

Канкурсантаў і гледачоў чакала насычаная праграма — з дэфіле, конкурсам аратарскага майстэрства і творчымі нумарамі. Так, падчас сцэнічнага нумара «Мастацтва пераўтварэння» ўдзельнікі прадстаўлялі свае творчыя здольнасці, якія адлюстроўваюць іх унутраны шлях і трансфармацыю. А падчас конкурсу па аратарскім майстэрстве кожны выступіў з прамовай «Мая трансфармацыя: ад мары да рэальнасці». Акрамя таго, напярэдадні фіналу прайшла абарона праектаў у інтэлектуальным туры.

Цікава і тое, што за ўсю гісторыю існавання конкурсу ўпершыню ўдзельнікі дэфіліравалі пад музыку і аранжыроўкі ўсім вядомых хітоў, якія былі створаны спецыяльна для іх. У прыватнасці, для гэтага праекта напісалі песню аб моладзі Мінска, якая суправаджала фінальны канцэптуальны выхад удзельнікаў.

Шоу атрымалася чароўным. Аднак за ўсім гэтым прыгожым малюнкам стаялі доўгія гадзіны падрыхтоўкі. На працягу двух тыдняў канкурсанты паўдзельнічалі ў майстар–класах, вывучылі мастацтва дэфіле ад «Міс Мінск — 2023» Надзеі Тоўсцікавай, паслухалі курсы па аратарскім майстэрстве, лекцыі аб асабістым брэндзе і правільнай абароне праектаў, перажылі мноства рэпетыцый і падбораў калекцый, а таксама наведалі прадпрыемствы сталіцы ў рамках Года якасці.

Пасля такой дбайнай падрыхтоўкі ўсе 12 удзельнікаў выступілі дастойна, і журы зрабіла свой выбар. Па выніках конкурсу першае месца заняла студэнтка Акадэміі кіравання пры Прэзідэнце Рэспублікі Беларусь Дар’я Васільева, другое — студэнт БДАТУ Павел Лагвіновіч, трэцяе — курсант БДАА Арэст Шасцілоўскі. А ў намінацыі «Студэнт года анлайн» перамагла Ксенія Карцялёва з БНТУ. Усе яны прадставяць Мінск на рэспубліканскім этапе конкурсу «Студэнт года».

Лізавета Голад

Источник: Звязда

Якім быў працоўны тыдзень сенатараў і юных парламентарыяў.

*     *     *

Маладзёжны парламент пры Нацыянальным сходзе Рэспублікі Беларусь і Маладзёжнае грамадскае аб’яднанне «Рух наперад» на базе Навукова–тэхналагічнага парка «БНТУ «Палітэхнік» правялі чацвёртае мерапрыемства сёмага набору лідарскай платформы «Каманда будучыні». У першай частцы мерапрыемства адбылася інтэлектуальная гістарычная віктарына «Нам дадзена права памятаць», прысвечаная гісторыі Вялікай Айчыннай вайны. Гэта праект Маладзёжнага парламента пры Нацыянальным сходзе Рэспублікі Беларусь, падрыхтаваны да 80–й гадавіны вызвалення Беларусі ад нямецка–фашысцкіх захопнікаў. Па выніках правядзення віктарыны былі выбраны пяць удзельнікаў, якія набралі найбольшую колькасць балаў і атрымалі сертыфікаты пераможцаў ад арганізатараў. У другой частцы мерапрыемства для іх быў арганізаваны трэнінг, прысвечаны тайм–менеджменту і арганізацыі сваёй дзейнасці, спікерам якога стаў член Маладзёжнага парламента пры Нацыянальным сходзе Рэспублікі Беларусь Арцём Мельнік. У рамках трэнінгу ўдзельнікам расказалі, як правільна размяркоўваць уласныя рэсурсы для вырашэння вялікага кола задач, валодаць навыкамі тайм–менеджменту і кіравання калектывам, эфектыўна вырашаць аператыўныя задачы, а таксама ствараць вакол сябе камфортнае асяроддзе для паспяховага дасягнення мэт.

*     *     *

Поўны тэкст публікацыі гл. у pdf–файле.

Вераніка Канюта

Источник: Звязда

Развіццё адносін з Кітаем — стратэгічны кірунак знешняй палітыкі Рэспублікі Беларусь. Бакі рэгулярна абменьваюцца візітамі на высокім узроўні, вядзецца актыўны дыялог, дынамічна развіваюцца міжведамасныя кантакты. Стабільна і імкліва развіваецца беларуска–кітайскае супрацоўніцтва ў навукова–тэхнічнай сферы. На працягу апошніх дзесяці гадоў ідзе актыўнае пашырэнне і ўмацаванне партнёрскіх сувязяў паміж вышэйшымі навучальнымі ўстановамі Рэспублікі Беларусь і Кітайскай Народнай Рэспублікі.

Адным з кірункаў гэтай дзейнасці з’явілася адкрыццё ў нашай краіне шасці інстытутаў Канфуцыя і аднаго класа Канфуцыя. Усяго ў свеце працуе 550 інстытутаў Канфуцыя і 1172 школы Канфуцыя ў 162 краінах.

Пагадненне аб стварэнні на базе Беларускага нацыянальнага тэхнічнага ўніверсітэта Інстытута Канфуцыя па навуцы і тэхніцы было падпісана 5 снежня 2013 года ў Штаб–кватэры інстытутаў Канфуцыя (г. Пекін). Партнёрам БНТУ па стварэнні Інстытута Канфуцыя з’яўляецца адна з вядучых ВНУ Кітая — Паўночна–Усходні ўніверсітэт. Урачыстае адкрыццё Інстытута Канфуцыя па навуцы і тэхніцы (ІКНТ) адбылося 21 кастрычніка 2014 года. Налета ІКНТ адсвяткуе сваё дзесяцігоддзе.

Узначальваюць Інстытут Канфуцыя па навуцы і тэхніцы: дырэктар з кітайскага боку — Лі Вэньсюэ, дырэктар з беларускага боку — Уладзімір Клеянкоў.

Актыўная падтрымка дзейнасці Інстытута Канфуцыя па навуцы і тэхніцы Беларускага нацыянальнага тэхнічнага ўніверсітэта (ІКНТ) забяспечваецца такімі дзяржаўнымі арганізацыямі, як Беларускі нацыянальны тэхнічны ўніверсітэт, Паўночна–Усходні ўніверсітэт, Міністэрства адукацыі Рэспублікі Беларусь, Пасольства Кітайскай Народнай Рэспублікі ў Рэспубліцы Беларусь, Кітайска–Беларускі індустрыяльны парк «Вялікі камень», Дзяржаўны камітэт па навуцы і тэхналогіях Рэспублікі Беларусь. Каардынуе работу з кітайскага боку Цэнтр міжнародных моўных абменаў і супрацоўніцтва Міністэрства адукацыі Кітайскай Народнай Рэспублікі і Міжнародны адукацыйны фонд кітайскай мовы.

Асноўная місія ІКНТ — актывізацыя навукова–тэхнічнага супрацоўніцтва паміж нашымі краінамі, ажыццяўленне падрыхтоўкі кваліфікаваных інжынерных кадраў, якія валодаюць тэхнічнай тэрміналогіяй на кітайскай мове, а таксама магчымасць дакрануцца да шматтысячагадовай гісторыі і культуры Кітая.

У адпаведнасці з задачамі ІКНТ ажыццяўляе правядзенне сумесных беларуска–кітайскіх навукова–інавацыйных форумаў, конкурсаў для стымулявання моладзі да супрацоўніцтва ў галіне навукі і тэхнікі, выдзяляе стыпендыі на вывучэнне кітайскай мовы ў КНР, рэалізоўвае правядзенне адукацыйных праграм па навучанні агульнай і тэхнічнай кітайскай мове для фарміравання пласта вучоных з інжынернай адукацыяй і веданнем кітайскай мовы.

У пералік асноўных штогадовых мерапрыемстваў, якія праводзяцца ІКНТ, уваходзяць:

— Беларуска–Кітайскі інавацыйны маладзёжны форум «Новыя гарызонты», які служыць выдатнай пляцоўкай для зносін маладых вучоных, дапамагае ім дасягнуць пэўных поспехаў у навукова–даследчай рабоце, а таксама актывізуе навукова–тэхнічнае і інавацыйнае супрацоўніцтва студэнцтва і маладых вучоных Беларусі і Кітая.

— Міжнародны конкурс навукова–тэхнічнага перакладу «Адзін пояс, адзін шлях». Конкурс праводзіцца ІКНТ пры падтрымцы Кітайска–Беларускага індустрыяльнага парка «Вялікі камень», а таксама кампаній — рэзідэнтаў парка. У рамках конкурсу перакладчыкі дэманструюць веданне тэрміналогіі тэхнічнай кітайскай мовы, валоданне паслядоўным і сінхронным перакладам.

— Летнія школы ў Кітаі і моўныя змены на базе дзіцячых аздараўленчых лагераў у Беларусі. Для слухачоў ІКНТ арганізаваны змены для навучання кітайскай мове і знаёмства з культурай Кітая.

— Пастаянна дзеючая мабільная выстава «Навука і тэхніка Кітая: гісторыя і сучаснасць», створаная ў БНТУ сумесна з Паўночна–Усходнім універсітэтам.

Найважнейшым кірункам дзейнасці ІКНТ з’яўляецца выкладанне кітайскай мовы. Сістэма навучання кітайскай мове складаецца з трох узроўняў (HSK ці Hanyu Shuiping Kaoshi): пачатковы, сярэдні, высокі. Высокі ўзровень падзяляецца на два падузроўні: кітайскую тэхнічную мову і кітайскую мову для бізнесу.

Па словах дырэктара ІКНТ Уладзіміра Клеянкова, унікальнасць Інстытута Канфуцыя па навуцы і тэхніцы заключаецца ў выкладанні гэтых двух курсаў. Навучанне курса «Тэхнічная кітайская мова» ажыццяўляецца з верасня 2015 года, а курса «Кітайская мова для бізнесу» — з верасня 2019 года.

Набор на навучанне праводзіцца двойчы ў год у восеньскім і вясновым семестры. Слухачамі курсаў з’яўляюцца спецыялісты навукова–тэхнічнай сферы, выкладчыкі, эканамісты, архітэктары, прадпрымальнікі і работнікі сумесных беларуска–кітайскіх кампаній. Падчас навучальнага працэсу выкарыстоўваюцца спецыялізаваныя навучальныя дапаможнікі па навуцы, тэхніцы і бізнесу, праводзяцца майстар–класы і лекцыі, у навуковай бібліятэцы БНТУ функцыянуе чытальная зала Інстытута Канфуцыя для самастойнай падрыхтоўкі навучэнцаў.

У інстытуце працуе 22 кваліфікаваныя кітайскія выкладчыкі. Распрацоўка адукацыйных праграм і навучанне на курсах кітайскай мовы ажыццяўляецца прафесійнымі выкладчыкамі Паўночна–Усходняга ўніверсітэта з вопытам работы, а таксама валанцёрамі, якія з’яўляюцца спецыялістамі ў галіне лінгвістыкі і літаратуразнаўства.

У адпаведнасці са сваім доўгатэрміновым стратэгічным планам ІКНТ праводзіць работу па стварэнні сеткі цэнтраў кітайскай мовы і культуры на базе ўніверсітэтаў, гімназій і школ. Паспяхова функцыянуюць навучальныя пункты ў Брэсцкім дзяржаўным тэхнічным універсітэце, Беларускім дзяржаўным тэхналагічным універсітэце, Беларускай дзяржаўнай сельскагаспадарчай акадэміі, Полацкім дзяржаўным універсітэце, Беларускім дзяржаўным універсітэце транспарту, Нацыянальным дзіцячым аздараўленчым цэнтры «Зубраня», Мінскім дзяржаўным палацы дзяцей і моладзі, у гімназіях Мінска: №№ 18, 22, 15, 40, а таксама ў школе кітайскай мовы настаўніка Вэй у Магілёве.

Адукацыйная сетка цэнтраў кітайскай мовы і культуры ІКНТ, якая ствараецца, дазваляе з кожным годам павялічыць колькасць слухачоў. Можна з упэўненасцю сцвярджаць, што іх ужо тысячы. Інстытут Канфуцыя па навуцы і тэхніцы БНТУ знаходзіцца ў пастаянным пошуку новых шляхоў і кірункаў сваёй дзейнасці з вядучымі ВНУ Паднябеснай. Сур’ёзную падтрымку ў стварэнні станоўчага іміджу ІКНТ аказваюць работнікі Медыяцэнтра Беларускага нацыянальнага тэхнічнага ўніверсітэта І. Ю. Камадзей і Э. М. Барычэўская.

За сваю адносна кароткую гісторыю Інстытут Канфуцыя па навуцы і тэхніцы знаходзіцца ў авангардзе найлепшых адпаведных устаноў, дэманструючы сваю стабільнасць і магчымасць арганізацыі навукова–тэхнічных мерапрыемстваў для развіцця кантактаў таленавітай моладзі Беларусі і Кітая.

Яўген Жыжаль

Фота з архіва ІКНТ БНТУ

Источник: Звязда

У Палацы культуры чыгуначнікаў адбыўся грандыёзны фінал Мінскага гарадскога этапу рэспубліканскага конкурсу «Студэнт года». Свае ўстановы вышэйшай адукацыі прадставілі i пазмагаліся за выхад у фінал 12 пераможцаў адборачных тураў.

У гэтым годзе канцэпцыяй гарадскога тура конкурсу «Студэнт года» сталі «Эксклюзіўныя авіялініі». Удзельнікаў чакала насычаная праграма: творчыя нумары, дэманстрацыя прамоўніцкага майстэрства па зададзеных тэмах. Інтэлектуальны тур (абарона праектаў) прайшоў напярэдадні фіналу.

Варта адзначыць, што на працягу двух тыдняў канкурсанты прайшлі сапраўдны творчы марафон: майстар–класы на згуртаванне, па дэфіле ад «Міс Мінск — 2023» Надзеі Толсцікавай, курсы па прамоўніцкім майстэрстве ад тэлевядучага Жана Сянкевіча, лекцыі аб асабістым брэндзе і правільнай абароне праекта ад дырэктара «Белбрэндаўдыт» Валянціны Дыніч, рэпетыцыі, прымеркі і падбор калекцый.

Пераможцай гарадскога этапа конкурсу «Студэнт года» стала студэнтка Беларускага дзяржаўнага медыцынскага ўніверсітэта Юлія Левіна. Яна падзякавала арганізатарам конкурсу i сваей камандзе, а таксама адзначыла, што падрыхтоўка была вельмі складанай, але ўсе намаганні поўнасцю апраўдаліся. Цяпер дзяўчына прадставіць Мінск на рэспубліканскім этапе конкурсу. Другое месца заняў студэнт Міжнароднага ўніверсітэта «МІТСО» Іван Осіпаў, а трэцяе падзялілі паміж сабой студэнтка БДУ Стэфанія–Віталія Віннічак і студэнтка БНТУ Арына Колесава.

Галоўная задача конкурсу «Студэнт года» — аб’яднаць моладзь, бо падчас адборачных тураў юнакі i дзяўчаты знаёмяцца адзін з адным і ствараюць сумесныя праекты. Аб гэтым сказаў першы сакратар Мінскай гарадской арганізацыі БРСМ Раман Бандарук: «Мы спадзяёмся, што з кожным годам усё больш студэнтаў будзе даведвацца аб гэтым конкурсе і пачне прадстаўляць сваю ўстанову адукацыі». На яго думку, інтэлектуальныя і творчыя маладыя людзі, якія ўдзельнічаюць у конкурсе, з’яўляюцца гонарам сваіх навучальных устаноў.

Сяргей Расолька

Источник: Звязда

Студэнцкі атрад — гэта не толькі часовыя працоўныя брыгады, але і выдатная школа падрыхтоўкі будучых высакакласных спецыялістаў, база для духоўнага і творчага развіцця маладога пакалення беларусаў. Менавіта гэтыя словы сталі лейтматывам прэс–канферэнцыі «Студатрады летам 2023. Дзейнасць і жыццё». «Вынікі трэцяга працоўнага семестра мы падводзім восенню. У кастрычніку будуць папярэднія вынікі ў штабах працоўных спраў устаноў вышэйшай адукацыі, тэрытарыяльных, абласных штабах студэнцкіх атрадаў. Закрыццё трэцяга працоўнага семестра папярэдне плануем на лістапад», — распавяла камісар Рэспубліканскага штаба студэнцкіх атрадаў БРСМ Анастасія Яленская. Якія ж папярэднія вынікі гэтага сезона працоўнай актыўнасці моладзі?

Часовая занятасць падлеткаў цягам усяго года

Увогуле, з пачатку года часова працаўладкавана больш за 40 тысяч юнакоў і дзяўчат, паведаміла начальнік упраўлення палітыкі занятасці Міністэрства працы і сацыяльнай абароны Алёна ДАКУКІНА. Ключавыя напрамкі, дзе яны праяўлялі сябе актыўна, — сфера паслуг, сельскагаспадарчыя работы, дробны рамонт у школах і пашыў школьных вырабаў.

Яна зазначыла, што часовая занятасць моладзі ў Беларусі арганізоўваецца на працягу ўсяго года, але найбольш актыўна моладзь выказвае жаданне працаваць менавіта ўлетку. «Матывацыя на спалучэнне працоўнай дзейнасці і навучання ў моладзі заключаецца не толькі ў дадатковым заробку, але і ў набыцці вопыту першай працы».

Паводле слоў Алёны Дакукінай, сёлета міністэрства падышло да арганізацыі часовай занятасці ў новым фармаце. У маі быў арганізаваны кірмаш вакансій. «Больш за дзве тысячы наймальнікаў адгукнуліся і былі гатовы ўзяць на работу моладзь. Заяўлялася каля 30 тысяч свабодных рабочых месцаў». Яна таксама расказала, што для хлопцаў і дзяўчат, якія не змаглі або не паспелі наведаць кірмаш вакансій, на партале службы занятасці была створана асобная ўкладка, дзе моладзь знаёмілася з вакансіямі. На сёння наймальнікамі з розных куткоў Беларусі заяўлена каля 12 тысяч працоўных месцаў.

Алёна Дакукіна таксама нагадала, што дзеці могуць займацца толькі лёгкімі відамі работ, якія не шкодзяць іх здароўю. У час канікулаў дзеці з 14 да 16 гадоў могуць працаваць 4 гадзіны 36 хвілін у дзень, а ад 16 да 18 гадоў — 7 гадзін. У час вучобы яны таксама маюць магчымасць працягваць працаваць. Так, працоўны дзень падлетка з 14 да 16 гадоў складзе 2 гадзіны 18 хвілін, з 16 да 18 гадоў — 3 гадзіны 30 хвілін.

Высокія і якасныя паказчыкі ў юбілейны год

Уласна ў студатрадах у Беларусі працаўладкаваны ўжо больш як 35 тысяч маладых людзей. І гэтая лічба будзе павялічвацца, таму што занятасць круглагадовая. Але асноўнае працаўладкаванне праходзіць у перыяд трэцяга працоўнага семестра, паведаміла камісар Рэспубліканскага штаба студэнцкіх атрадаў БРСМ Анастасія ЯЛЕНСКАЯ.

«У гэтым годзе студатрадаўскаму руху спаўняецца 60 гадоў. Г эта для нас вельмі знакавая падзея. Упершыню ў 1963 годзе 2,5 тысячы студэнтаў выехалі ва Уральскую вобласць на сваю першую цаліну, і дагэтуль мы падтрымліваем гэтую традыцыю. Прыемна, што на працягу ўсіх гэтых 60 гадоў студатрадаўскі рух ні на год не спыняўся. І мы гэтым, вядома, вельмі ганарымся».

Камісар нагадала, што ў трэцім працоўным семестры 2023 года рэалізоўваюцца такія працоўныя праекты, як «Атлант», «Трактарабудаўнік» у ААТ «МТЗ», «Аўтазаводзец» у ААТ «МАЗ», «Палессе» ў ААТ «Гомсельмаш», «Медыкус», «Горад маладосці». Традыцыйна студатрады выехалі і за межы краі ны. «Самае галоўнае, што студэнцкі атрад — гэта не проста працаўладкаванне. Гэта работа ў камандзе, атрыманне вопыту, вялікая камісарская работа, — адзначыла Анастасія Яленская. — Хочацца адзначыць, што дзякуючы намаганням дзяржавы і асабіста Прэзідэнта Беларусі, Рэспубліканскага штаба студэнцкіх атрадаў БРСМ, арганізацый, якія прымаюць, мы падыходзім да высокіх і якасных паказчыкаў у гэты юбілейны год».

Якія кірункі работы студатрадаў найбольш запатрабаваны ў моладзі? Па словах Анастасіі Яленскай, традыцыйна на працягу некалькіх гадоў самая вялікая іх колькасць — у сэрвісным кірунку: гэта добраўпарадкаванне тэрыторыі, работа ў сферы аказання паслуг. Далей ідзе сельскагаспадарчы і педагагічны кірунак. Усе астатнія профілі размяркоўваюцца ў роўнай колькасці.

Дзебайцы шчыравалі гэтым летам

Намеснік начальніка аператыўнага штаба па арганізацыі работы студэнцкіх атрадаў БДУ Антон КУПЧЫН расказаў, што ў Беларускім дзяржаўным універсітэце вялікая ўвага ўдзяляецца арганізацыі часовай занятасці навучэнцаў. «Ужо не першы год ідзе работа па папулярызацыі студатрадаўскага руху. І прыемна разумець, што гэта работа прыносіць вынік. У 2023 годзе штабам па арганізацыі работы студэнцкіх атрадаў БДУ было арганізавана 69 атрадаў колькасцю 1096 навучэнцаў», — адзначыў ён.

Сёлета студэнты БДУ працавалі ў розных профілях. «Найбольш папулярнымі з’яўляюцца сэрвісныя: афіцыянты, работнікі колцэнтраў, абслуговы персанал. На другім месцы педагагічныя атрады — выхавальнікі ў аздараўленчых лагерах. Далей — вытворчыя атрады (работа ў цэхах вядучых прадпрыемстваў нашай краіны). І з імі на ўзроўні сельскагаспадарчыя атрады: праполка раслін, уборка ўраджаю».

Сакратар пярвічнай арганізацыі БРСМ БНТУ Аляксей БАЛЫШ паведаміў, што ў Беларускім нацыянальным тэхнічным універсітэце было створана 37 студатрадаў агульнай колькасцю больш як 1,5 тысячы чалавек. «У гэтым годзе нашы студэнты ў складзе студэнцкага атрада прынялі ўдзел у Рэспубліканскім працоўным праекце «Аўтазаводзец–2023», працавалі на будоўлі функцыянальнага комплексу на скрыжаванні вуліцы Кірылы Тураўскага і праспекта Незалежнасці, будавалі гандлёвы цэнтр», — сказаў ён.

Дар’я ЛУКАШЭВІЧ, сакратар пярвічнай арганізацыі БРСМ БДПУ імя М. Танка, адзначыла, што ў сувязі са спецыфікай ва ўніверсітэце найбольш папулярныя педагагічныя атрады. «Так, нашы педагагічныя атрады працуюць у найлепшых установах адукацыі. Атрад «Сузор’е» — у Нацыянальным дзіцячым аздараўленчым цэнтры «Зубраня».

Паводле яе слоў, у ВНУ таксама ёсць вытворчыя атрады, якія працавалі на заводзе электронікі і бытавой тэхнікі «Гарызонт». Сэрвісныя атрады прыводзілі ў парадак інтэрнаты. А таксама сёлета Беларускі дзяржаўны педагагічны ўніверсітэт арганізаваў сэрвісны атрад на базе мемарыяльнага комплексу «Хатынь», дзе студэнты гістарычнага факультэта працавалі экскурсаводамі.

Сакратар першаснай арганізацыі БРСМ Беларуска–Расійскага ўніверсітэта Ірына ШАЛЫГІНА падкрэсліла, што ва ўніверсітэце займаюцца не толькі ўладкаваннем у студатрады, але таксама індывідуальным працаўладкаваннем. «У гэтым годзе ў нас працуе 24 атрады колькасцю 370 чалавек. Наш будаўнічы атрад «Тытан» выехаў у Варонеж, дзе працаваў на будаўніцтве школы. Акрамя таго, кожны год мы шчыруем у рамках рэспубліканскіх працоўных праектаў — гэта «Атлант», «Аўтазаводзец», «Трактарабудаўнік».

Важны элемент дастойнай працы бяспека

Як моладзь забяспечваюць бяспечнымі працоўнымі месцамі, растлумачыў дырэктар Дэпартамента дзяржаўнай інспекцыі працы Міністэрства працы і сацыяльнай абароны Аляксандр СЕМІЧ. Ён адзначыў, што першы вопыт работы павінен быць станоўчы.

«Важны элемент дастойнай працы — бяспека. Работа па гарантаванні бяспекі аб’ектаў, на якіх будуць працаваць будатрады, пачынаецца зімой, калі на сайтах мясцовых выканаўчых распарадчых органаў з’яўляецца інфармацыя аб арганізацыях, што плануюць прыняць студэнцкія атрады», — сказаў дырэктар Дэпартамента.

Паводле яго слоў, у 2019 годзе паміж Міністэрствам працы і сацыяльнай абароны і Федэрацыяй прафсаюзаў было падпісана пагадненне па пытаннях стварэння бяспечных і здаровых умоў працы і прафілактыкі вытворчага траўматызму, у якім прапісана гарантаванне бяспекі тых аб’ектаў, дзе будуць працаваць студэнцкія атрады.

«Умоўна арганізацыі дзеляцца папалам паміж міністэрствам і прафсаюзамі, і да пачатку лета ўсе яны павінны быць абследаваны або дзяржаўнай інспекцыяй працы, або тэхнічнай інспекцыяй працы прафсаюзаў», — распавёў Аляксандр Семіч. Наступны этап — накіраванне Дэпартаментам інфармацыйнага ліста ўсім зацікаўленым. «У ім расказваецца, як правільна арганізаваць працу менавіта з улікам работы з моладдзю. Бо многія з хлопцаў і дзяўчат яшчэ непаўналетнія, што накладвае абмежаванні як па відах выкананых работ, так і па іх працягласці.

Пасля на працягу лета Дэпартамент сумесна з прафсаюзамі імкнецца мінімум па адным разе наведаць усе аб’екты, на якіх працуюць студэнты. «У асноўным мы выяўляем такія парушэнні: прыцягненне моладзі да работ, бяспечнаму выкананню якіх яны не навучаны, і незабеспячэнне работнікаў сродкамі індывідуальнай абароны або непрымяненне гэтых сродкаў. Большасць такіх парушэнняў устараняецца яшчэ непасрэдна ў ходзе рэйду мабільнай групы або правядзення маніторынгу».

Матэрыялы падрыхтаваў Сяргей Расолька

Источник: Звязда